Pan fo angen i chi gael mwy o brofion

Nid canser yw’r rhan fwyaf o newidiadau sydd i’w gweld ar famogram. Nid oes canser y fron ar y rhan fwyaf o’r merched rydyn ni’n eu galw’n ôl.

Weithiau, bydd angen i ni alw merched yn ôl am fod nam technegol wedi digwydd. Byddwn ni'n rhoi gwybod i chi os dyma'r rheswm dros eich galw.

Byddwn ni'n galw'n ôl tua un mewn 20 o'r merched rydyn ni'n eu sgrinio am fod ymddangosiad y pelydr-x yn awgrymu bod gofyn gwneud mwy o brofion. Fe allai'r profion yma gynnwys mwy o famogramau, archwiliad clinigol, sgan uwchsain ac, o bosib, biopsi nodwydd.

Mwy o famogramau arbenigol

Bydd radiograffydd yn tynnu mwy o olygon o’r fron.

Archwilio’r fron

Rydyn ni’n cynnig i ddoctor arbenigol archwilio bronnau’r rhan fwyaf o’r merched rydyn ni’n eu galw’n ôl. Yn aml iawn, bydd yr archwiliad a’r mamogramau ychwanegol yn dangos bod yr abnormaleddau cychwynnol yn ddiniwed.

Sgan uwchsain

Fe fydd radiolegydd yn rhoi ychydig o jel ar y croen ac yn arwain padl blastig dros y fron i greu delwedd fwy manwl o’i meinwe.

Biopsi

Bydd arbenigwr wedi’i hyfforddi’n cymryd sampl bach o feinwe gyda nodwydd arbennig. Fel rheol, fe gaiff hyn ei wneud dan anaesthetig lleol.

Er bod rhai merched yn cael eu canlyniadau cyn gadael y ganolfan sgrinio, fe fydd canlyniadau biopsi’n cymryd mwy o amser.

Dim ond rhai o’r merched sy’n cael eu galw’n ôl fydd yn cael diagnosis o ganser.

Beth os bydd angen triniaeth arna i?

Os cewch chi ddiagnosis o ganser y fron, dod o hyd iddo'n gynnar sy'n cynnig y cyfle gorau i'w drin yn llwyddiannus. Byddwn ni'n trafod yr holl opsiynau'n llawn gyda chi a chytuno ar drefniadau'ch triniaeth.